Axentes da Garda Civil rescataron en Lugo a unha menor de idade despois de que os seus pais denunciasen un suposto rapto por parte do seu noivo na localidade de Olmedo, na provincia de Valladolid, e os investigadores tratan de determinar as circunstancias.
A moza, de 15 anos, foi rescatada o mércores por axentes da Garda Civil fortemente armados nunha vivenda da rúa Amizade, na zona do Castiñeiro, na cidade de Lugo e atópase en perfecto estado de saúde. Segundo o seu testemuño, o mozo, duns 18 anos, levouna de Olmedo (Valladolid) onde, a moza reside coa súa familia.
Fontes da Garda Civil explicaron que a investigación continúa aberta para determinar, coa achega dalgunhas testemuñas, o sucedido, xa que dispoñen de dúas versións totalmente diferentes sobre o sucedido. Engadiron que de momento hai dous detidos, pero non descartan que poida haber máis persoas arrestadas nos próximos días.
