A Deputación de Lugo iniciou esta semana os traballos de mellora da LU-P-1807, que conecta Chantada e Carballedo, que inclúen a limpeza das cunetas e o acondicionamento do firme de practicamente todo o trazado desta vía, cun orzamento de case 250.000 euros. En nota de prensa, o Goberno provincial detallou que as actuacións, que está a levar a cabo a empresa Fevisa Vías e Obras S.L., comezaron esta semana coa limpeza das cunetas e continuarán nos próximos días coa mellora da drenaxe e o acondicionamento do firme da vía.
Estas obras permitirán reparar practicamente todo o trazado da estrada, desde o inicio da vía ata o punto quilométrico 9,4, cun investimento de case 250.000 euros. Todo iso para incrementar a seguridade viaria e mellorar as condicións de circulación da estrada. Unha actuación que a Deputación cualificou de “relevancia” para as parroquias de Santa Uxía e Cartelos, nos municipios de Chantada e Carballedo, xa que é unha vía de uso habitual para os veciños.
