O conselleiro de Presidencia, Xustiza e Deportes, Diego Calvo, acompañado da directora xeral de Administración Local, Natalia Prieto, reuniuse coa presidenta da Deputación de Lugo, Carmela López, para abordar as achegas do organismo provincial ao anteproxecto da Lei de Administración Local de Galicia. O Goberno galego cumpría así o compromiso acadado na reunión celebrada a finais de marzo entre a mandataria provincial e o titular da Xunta, Alfonso Rueda.
O Executivo autonómico salientou que este encontro se enmarca no proceso de escoita e diálogo, así como de colaboración institucional, aberto para enriquecer o texto coas propostas que se realicen. O conselleiro valorou positivamente o bo clima e o carácter construtivo da xuntanza. Malia as críticas recibidas desde a presidencia da Federación Galega de Municipios e Provincias (Fegamp), a Xunta defende que o anteproxecto resulta dun proceso participativo que recolle a maioría das demandas do municipalismo.
Durante a tramitación, a Administración autonómica pretende atender todas as achegas para acadar o máximo consenso posible. De feito, xa se avalían as alegacións recibidas co obxectivo de integrar no texto as que presenten un espírito construtivo. Sobre o papel das deputacións, o Goberno galego resalta que son unha peza fundamental do mapa local e que a lei busca unificar a forma de prestar competencias no territorio e concretar as súas funcións.
LÓPEZ: A XUNTA ÁBRESE A “REFORMULAR” OBRIGACIÓNS
Pola súa banda, Carmela López reivindicou como un logro que a Xunta se abra a reformular as obrigacións dos concellos e das deputacións que figuran no anteproxecto. A presidenta sinalou que o Executivo escoitou as sensibilidades e particularidades de Lugo, xa que non todas as institucións provinciais son iguais, e insistiu na necesidade dunha lei que se poida cumprir.
Do mesmo xeito, advertiu que cómpre matizar a postura en relación aos recursos, pois se as deputacións asumen máis competencias, deben coñecer cales son e que transferencias económicas recibirán para exercelas. Segundo a institución lucense, logrouse que a Xunta elimine o artigo 95, relativo á autoorganización das deputacións, que outorgaba á Administración autonómica unha competencia de coordinación en servizos sociais sen definir o seu alcance.
En canto ao financiamento local, a Xunta aceptou estudar a proposta da Deputación para establecer unha porcentaxe mínima garantida sobre o orzamento autonómico destinada ao Fondo de Cooperación Local, coa finalidade de dotar de maior estabilidade e previsión aos recursos dos concellos.
