A presidenta da Deputación de Lugo, Carmela López, destacou Pedrafita do Cebreiro como exemplo de como “desde o rural e a identidade constrúese provincia”. Tal e como trasladou o Goberno provincial nunha nota de prensa, López foi a encargada de pregoar o trixésimo dezaoito edición da Feira do Queixo do Cebreiro, que se celebrou este venres.
Alí, a mandataria provincial reivindicou na súa intervención a “importancia” do rural e da identidade como elementos “fundamentais” para construír o futuro da provincia. Neste sentido, situou a Pedrafita como “exemplo de municipio que consegue manter viva a comunidade grazas ao esforzo dos veciños, o coidado do territorio e a preservación das tradicións”.
“O verdadeiro valor deste territorio está na xente. Na xente que decidiu quedar. Na que decidiu coidar. Na que decidiu construír o futuro aquí”, salientou. Así mesmo, subliñou o papel deste territorio como porta de entrada a Galicia, un lugar que marca un “antes e un despois” para quen chega, especialmente para os peregrinos do Camiño de Santiago.
Tamén, no pregón destacou o valor do queixo de O Cebreiro, subliñando que “non é só alimento, senón tamén cultura, herdanza e identidade”, e froito do traballo de xeracións que preservaron a esencia do rural galego.
