O Tribunal Supremo decidiu non admitir o recurso presentado por Inversiones Malleo contra a desestimación dunha reclamación de responsabilidade patrimonial ao Concello de Lugo por un importe de 3,5 millóns de euros por reducir a edificabilidade no solar número 25 da avenida Doutor García Portela, o antigo terreo de Telefónica.

Diso informou o Consistorio nun comunicado, no que explica que a decisión do alto tribunal de inadmitir o recurso de casación pon fin á vía xudicial iniciada en 2013 por esta empresa, que esixía responsabilidade patrimonial á administración local “por non poder construír na parcela situada entre o edificio do sanatorio Portela e O Garañón”, tras a aprobación do Plan Xeral de Ordenación Municipal (PXOM).

A decisión do Tribunal Supremo prodúcese despois de que o Tribunal Superior de Xustiza de Galicia (TSXG) rexeitase previamente, en outubro de 2017, o recurso.

Tal como explicou o concello, o Tribunal, que impón 1.000 euros de costas a Inversiones Malleo, inadmite a trámite o recurso “por falta de fundamentación suficiente” de que ocorresen os supostos e por referirse a cuestións de feito “excluídas da casación”.