O Partido Popular de Lugo reiterou o seu compromiso co barrio da Milagrosa e volveu a esixir ao goberno local, integrado por PSOE e BNG, unha actuación “firme e eficaz” para garantir a seguridade e a convivencia na rúa Tui e a súa contorna.
En concreto, os populares aseguran que “a presión veciñal e política” foi clave para “forzar” a reacción municipal ante unha situación “que levaba meses documentada”, segundo aseguraron. Así, a portavoz do PP, Elena Candia, sinalou a súa intención de trasladar ás preto de 1.500 persoas do barrio que apoiaron a campaña por unha contorna segura que a súa implicación “non foi en balde”.
Segundo explicou, a recollida de firmas e as iniciativas levadas a cabo polo grupo municipal obrigaron ao executivo local a actuar, algo que, ao seu xuízo, “non sucedería de non mediar esa presión”.
Así, o PP volveu a criticar que o goberno municipal “non reaccionou coa dilixencia necesaria” a pesar de contar con actas e informes policiais que recollían distintas infraccións. Neste sentido, referíronse ao procedemento sancionador contra o establecemento As Palmeiras, e criticaron que non se iniciase ata despois das denuncias públicas da oposición.
Os populares lembraron que este local “acumula desde hai anos actuacións policiais, inspeccións técnicas e queixas veciñais por unha actividade reiteradamente incompatible coa licenza concedida”.
Ademais, advertiron de que, segundo as actas policiais coñecidas, as intervencións realizadas poderían dar lugar a expedientes sancionadores independentes. Ao seu xuízo, a decisión do goberno local de agrupar as actuacións en só dous expedientes ten “consecuencias xurídicas relevantes”.
Con todo, os populares insistiron en que “non se trata dunha controversia política, senón do cumprimento dunha obrigación legal: protexer a convivencia, a seguridade, a saúde e o dereito ao descanso dos veciños da rúa Tui”.
