A Audiencia provincial de Lugo pechou este xoves o caso dun home acusado de agredir sexualmente a unha menor en complicidade coa nai da vítima, uns feitos que tiveron lugar entre 2017 e 2019. Desta forma, Fiscalía e acusación particular chegaron a un acordo con ambos os avogados defensores, polo que os acusados recoñeceron os feitos conseguindo unha rebaixa da pena desde os 27 anos que se pedían inicialmente até os tres anos e sete meses, a cambio aseguraron unha indemnización para a vítima de 150.000 euros, moi por encima dos 20.000 que solicitaba a Fiscalía.
Os feitos remóntanse a 2017, cando a vítima, que tiña naquel momento 12 anos de idade, foi obrigada pola súa nai a manter relacións sexuais co home en varias ocasións. Os feitos repetíronse durante dous anos até o día o seu décimo cuarto aniversario. Ademais, a nai foi acusada de malos tratos, xa que, como recoñeceu, golpeou á menor porque choraba durante as agresións, algo do que se queixaba o home. Por cada encontro a menor recibía 50 euros, pero tiña que entregar a metade á súa nai.
Ao final, aceptaron os dous acusados unha pena de 3 anos, 7 meses e 4 días de prisión, que se cumprirá integramente con ingreso nos próximos días, en ambos os casos por agresión sexual e indución á prostitución. Ademais, el deberá manter afastado da vítima durante 6 anos e despois terá un período de liberdade vixiada de 5 anos, ademais da prohibición de traballar preto de menores por outros 8.
Ela contará coa mesma pena, á que se lle suman 40 días de traballo comunitario polos malos tratos, ademais de afastamento por 6 anos e inhabilitación da patria potestade por 1 ano. Tampouco poderá traballar en contacto con menores por un período de 8 anos.
Esta cuantiosa rebaixa da pena foi en común acordo pola vítima, que a día de hoxe xa é maior de idade e “busca unicamente unha reparación económica á altura dos feitos“, tal e como explicou o avogado da acusación particular, Jacobo Vázquez. “Os dous acusados xa ían recibir unha importante rebaixa nas penas por dilacións indebidas no proceso, que se atrasou máis de cinco anos, e tamén pola reparación do dano, debido a que xa ingresaron na conta da vítima 100.000 euros. Pero, o importante é que ela con este diñeiro poida refacer a súa vida“, concluíu o avogado.
