O senador do PP lucense Manuel Balseiro defenderá este mércores na Comisión de Transformación Dixital unha iniciativa para instar o Goberno central a “garantir” o despregamento de infraestruturas de telecomunicacións en todo o territorio, especialmente nas zonas do rural da provincia de Lugo. Segundo detallaron os populares nun comunicado, esta proposta busca combater a fenda dixital, reforzar a cohesión social e territorial e asegurar que a conectividade chegue a toda a cidadanía.
A iniciativa reclama ao Executivo que garanta o despregamento de infraestruturas nos municipios que o necesiten e que impulse a extensión das redes de telefonía móbil e de tecnoloxía 5G, con especial atención ao ámbito rural. Concretamente, a proposta esixe garantir o acceso á telefonía móbil e fibra óptica na totalidade da provincia de Lugo, así como outros servizos de conectividade que permitan superar a actual situación de “sombra e apagamento dixital” que sofren numerosos municipios rurais.
“A conectividade é un servizo básico imprescindible. Non se pode falar de igualdade de oportunidades nin de loita contra o despoboamento mentres haxa territorios enteiros sen acceso real a Internet ou á telefonía móbil”, subliñou Balseiro.
