A deputada do BNG por Lugo Olalla Rodil asegurou que os orzamentos da Xunta para 2026 son “como o día da marmota” e mostran “falta de proxectos” para a provincia.
Tal e como trasladou nunha nota de prensa, a parlamentaria nacionalista lamentou que as contas do próximo ano “confirmen o abandono do PP a Lugo”, ao ser “unha sarta de promesas atrasadas no tempo, sen medidas novas”.
En concreto, Rodil puxo como “proba deste abandono” o feito de que se “volva a anunciar a reforma de centros de saúde que xa foron anunciadas varias veces”.
Neste sentido, a deputada do Bloque sinalou outros proxectos que a Xunta “non acaba nin destina os suficientes recursos”, como o Porto Seco de Monforte ou a autovía entre Nadela e Sarria.
“Os orzamentos de 2026 son a constatación de que o PP non ten ideas, non ten proxecto e non ten interese en darlle a Lugo o lugar que merece. Mentres outras provincias avanzan, Lugo continúa en punto morto”, censurou Rodil.
Por todo iso, avanzou que o BNG impulsará emendas “para pór os intereses e as necesidades dos lucenses e profundar nun maior compromiso con Lugo”.
