O PSdeG-PSOE da provincia de Lugo, a través da súa secretaria de Organización Provincial, Pilar García Porto, condenou con firmeza o que consideran un “ataque” contra a súa sede provincial, na que apareceu este martes unha pintada ofensiva no portal coa mensaxe ‘Rojos de Mierda’.
Os socialistas, que formalizaron a consecuente denuncia ante a Policía Nacional, consideran este acto “un atentado contra a liberdade política e de expresión” e un claro intento de “sementar odio e intimidación contra quen defenden ideas progresistas”.
García Porto advertiu que este tipo de feitos son “o eco dos argumentarios da dereita e a extrema dereita, unha mostra de violencia democrática que sufrimos e condenamos con absoluta rotundidade. Non falamos só de violencia física, tamén da verbal e simbólica, como estas pintadas, que buscan reproducir a mensaxe radical da ultradereita”.
Tamén consideran os socialistas unha “covardía” que estes actos se cometan “amparados no anonimato”, por iso nun comunicado acusan os autores de ser “incapaces de dar a cara para defender os seus argumentos en política, recorrendo unicamente á violencia como modo de expresión”.
Aínda que non é a primeira vez que se produce un acto deste tipo, García Porto subliñou que se trata de “un comportamento que nada ten que ver co diálogo nin co respecto político. Non é o tipo de política que defendemos nin a que queremos para o noso país”. Ademais, asegurou que a resposta do partido será “sempre máis democracia, máis diálogo e máis compromiso coa sociedade”.
Os socialistas lucenses lembran os máis de 140 anos de historia do partido, do que afirman que mantén “unha traxectoria ao servizo da cidadanía, comprometido coa liberdade, a convivencia e o respecto fronte a quen só saben impor o insulto, a crispación e a intolerancia”.
A viceportavoz segunda do Grupo Socialista, Lara Méndez, trasladou este martes unha condena “categórica” ao “atentado” contra a sede do PSdeG de Lugo, que apareceu cunha pintada na que se pode ler ‘Vermellos de merda’. Antes de abordar os asuntos que o PSdeG levará ao pleno da semana próxima, en sede parlamentaria, Méndez lamentou a pintada “insultante” que sufriu a súa sede en Lugo.
“Estamos ante un ataque contra a liberdade de expresión e contra un partido político, que lembra tempos pasados que algúns parecen non superar. Expresamos nosa máis firme condena”, resolveu a dirixente socialista.
CONDENA DESDE O PP
O Partido Popular de Lugo manifestou a súa “condena e rexeitamento absoluto” ás pintadas aparecidas na sede provincial do PSOE este martes, un acto que cualifican de “inadmisible” e afastado dos valores de convivencia que deben rexer na sociedade.
O PSdeG-PSOE da provincia de Lugo, a través da súa secretaria de Organización Provincial, Pilar García Porto, fixo público o que cualificou como “ataque” á súa sede a través dunha pintada ofensiva no portal coa mensaxe ‘Vermellos de merda’.
