O grupo municipal do Partido Popular volveu reclamar este luns ao Goberno local unha solución para a rúa Tui onde o after Las Palmeras acumula numerosos expedientes sancionadores.
A portavoz popular, Elena Candia, reclamou de novo que se actúe de inmediato para “garantir a seguridade dos veciños” e acusounos de “falta de vontade política” na tramitación de expedientes sancionadores. Os populares aseguran que o executivo tardou 214 días en impulsar un procedemento contra este local, a pesar de que o prazo legal era de dez.
Segundo explica a popular, as actas de inspección revisadas reflicten “incumprimentos graves e reiterados” neste establecemento, e consta un expediente datado o 17 de decembro de 2024 que non se activou ata o 18 de xullo de 2025, sete meses despois de solicitarse. “Curiosamente, o expediente móvese só once días despois de que pedísemos medidas para os problemas de convivencia na rúa Tui”, apuntan desde o PP.
Os populares lembran, ademais, que o entón responsable de Mobilidade, Rubén Arroxo, defendeu que “ningún cargo político pode pechar un negocio, senón que debe ser un procedemento técnico quen o determine”, aínda que recoñecía ordenar un peche temporal no seu momento “por existir denuncias policiais e informes que o permitían”.
O PP sostén que, a pesar das evidencias, o goberno local “segue sen dar solucións e negando a problemática”. Citan máis de 30 informacións publicadas en medios durante o último ano, denuncias veciñais e actas desde marzo de 2023 que, ao seu xuízo, certifican incumprimentos da normativa.
