A sección segunda da Audiencia Provincial de Lugo absolveu a un acusado dun delito continuado de agresión sexual á filla menor de idade da súa parella. O tribunal indica que non resulta acreditado que o procesado lle dera un bico nos beizos á filla da súa muller cando tiña 12 anos, nin que a partir de novembro de 2010 ata setembro-outubro de 2015 a agredira sexualmente.
A Sala explica na resolución que o testemuño da vítima non se aprecia suficiente para enervar a presunción de inocencia do acusado, xa que advirte “contradicións substanciais e relevantes nas súas declaracións prestadas no procedemento, quedando con iso afectada a coherencia e significación substancial do narrado”.
Ademais, recalca que “tampouco existen corroboracións periféricas obxectivas que permitan afirmar que os feitos polos que se formula acusación realmente tiveron lugar, o que conduce a absolver ao acusado do delito continuado de agresións sexuais a menor de 16 anos polo que se formula acusación”.
“Como xa dicía a sentenza do Tribunal Supremo de 29 de decembro de 1997, a función do enxuiciamiento penal non consiste propiamente nunha investigación para determinar cal das dúas versións dos feitos, a da acusación e a da defensa, situadas no mesmo plano, resulta máis probada, senón en someter ao contraste probatorio a hipótese acusatoria. Se esta non resulta debidamente acreditada, a consecuencia ineludible é a absolución, con independencia de que tampouco se puido acreditar a versión fáctica da defensa”, indican os maxistrados na resolución, contra a que cabe presentar recurso ante o Tribunal Superior de Xustiza de Galicia (TSXG).
