Axentes da Policía Local de Lugo detiveron a un veciño da cidade como presunto autor dun delito de violencia de xénero, tras acudir ao domicilio despois de recibir un aviso dunha das fillas da parella, que chamou á Policía Local desde Sevilla. Segundo informaron fontes policiais, os feitos ocorreron na madrugada do pasado domingo, cando o 092 recibiu unha chamada telefónica desde Sevilla, na que unha muller alertaba de que a súa nai estaba a ser agredida nun domicilio de Lugo.
Ata a vivenda trasladáronse dúas dotacións policiais que, ao chegar, escoitaron unha forte discusión desde o exterior, e a voz dun home proferindo insultos. Os axentes foron recibidos no domicilio por outro home, irmán do presunto agresor, que estaba a tratar de separar á parella. Así mesmo, tamén estaban presentes dous fillos menores da parella, de 10 e 15 anos de idade.
Os funcionarios entrevistáronse por separado con ambas as partes, e a muller sinalou que viña sufrindo malos tratos físicos e psicolóxicos desde facía tempo, unha versión que corroboraron os seus fillos. A nai e os menores foron trasladados a un centro sanitario. Mentres, os axentes procederon á detención do home, que tamén foi evacuado a un centro médico, como presunto autor dun delito de violencia de xénero.
