O BNG reclamou ao Goberno que execute as obras da autovía A-6 por tramos para reducir o impacto na mobilidade dos veciños dos municipios lugueses de Baralla e Becerreá. Este luns, o deputado nacionalista no Congreso Néstor Rego visitou Baralla para reunirse con afectados as obras de rehabilitación da autovía xunto á parlamentaria autonómica Montse Valcárcel.
Alí, Rego recolleu as queixas veciñais sobre o impacto das “moi necesarias” obras de reparación do firme pero que considera que están a ser mal xestionadas pola Admininstración central.“O Goberno comezou as obras sen previo aviso e pechando un gran tramo da estrada canalizando a circulación en dobre sentido pola plataforma de dirección Madrid-A Coruña”, aseverou Rego, que apuntou que a situación se viu “agravada” polo inicio dos traballos de rehabilitación na estrada autonómica LU-710.
O Bloque censura a “nula planificación e coordinación” entre as administracións implicadas nestas obras, é dicir, a Xunta e o Goberno central, ás que urxe a adoptar medidas para reducir os problemas de mobilidade na zona. “A zona afectada permite a realización das obras por tramos, mediante a interconexión e intercambio de calzada para a súa utilización en dobre sentido”, defendeu Rego.
