Catro dos cinco acusados na peza central da Operación Carioca, a maior trama de prostitución de Galicia, recoñeceron este martes en Lugo os cargos na súa contra tras alcanzar as súas respectivas defensas acordos de conformidade coa Fiscalía na primeira vista do xuízo final da macrocausa celebrado na Audiencia Provincial de Lugo.

Trátase dos tres proxenetas imputados na peza final por un delito de suborno pasivo –José Manuel García Adán, Marcos Grandío Ascariz e Jesús Varela– e do cabo da Garda Civil, Armando Lorenzo, o principal procesado, para o que a Fiscalía solicitaba inicialmente unha pena de prisión acumulada de 21 anos por unha decena de delitos —entre eles o de agresión sexual– e cuxa condena final non excederá dos seis anos.

Nunha primeira vista reservada para debater as cuestións previas do caso e na que a lectura das 28 páxinas do escrito de acusación do Ministerio Público por parte da presidenta do Tribunal prolongouse durante máis dunha hora, tanto a Fiscalía como os letrados dos catro acusados dispostos a asinar un acordo recoñeceron a existencia de “termos de conformidade” entre as partes.

Será, pois, na segunda sesión do xuízo, sinalada para este mércores na Audiencia Provincial, cando se coñezan os detalles dos acordos de conformidade alcanzados con carácter previo entre Fiscalía e defensas, aínda que as penas previstas para o tres proxenetas procesados limitaranse ao pago dunha multa.

Con catro concisos “si, recoñezo” aceptaron os catro imputados cuxas defensas chegaron a un acordo coa Fiscalía os cargos formulados na súa contra. Tres deles fixérono directamente desde o banco mentres que o cuarto, García Adán, recoñeceu a súa culpabilidade desde prisión por videoconferencia. Todos eles acolléronse ao seu dereito a responder tan só a preguntas da Fiscalía.

“VULNERACIÓN DO DEREITO DE DEFENSA”

O único do cinco imputados na peza central da Operación Carioca que se negou a asinar un acordo de conformidade, Julio Baquero, xefe do Equipo de Muller e Menores da Garda Civil (EMUME) no momento dos feitos, prestará declaración ante a xuíza este mércores tras a práctica da proba testifical.

O seu avogado solicitou durante o capítulo de cuestións previas a “nulidade de todas as actuacións” ao asegurar que estas se atopaban “viciadas” desde o inicio da instrución, o que motivou a situación de “indefensión” do seu cliente. Tamén denunciou o letrado a “vulneración do dereito de defensa” do procesado durante toda a investigación, a existencia dunha instrución do caso “parcial e deficiente” e o “abuso no uso de testemuñas protexidas de maneira non xustificada”. “A prescrición dos delitos é clarísima”, engadiu, un punto co que a Fiscalía mostrou o seu desacordo.

CRÍTICAS Á INSTRUCIÓN

Antes do inicio da vista na Audiencia Provincial de Lugo, os avogados de dous dos proxenetas xulgados, así como unha das letradas da acusación, valoraron os acordos negociados con carácter previo e coincidiron en criticar o longo período de tempo transcorrido desde o inicio da investigación ata a celebración da vista da peza central da operación: máis de 16 anos.

PROTESTAS NA PREVIA DO XUÍZO

Na tarde do luns, apenas algunhas horas antes da celebración da primeira sesión do xuízo da peza central da Operación Carioca, ao redor de medio centenar de persoas convocadas pola Plataforma contra a Impunidade do Caso Carioca concentráronse fronte ao edificio dos Xulgados de Lugo para denunciar os denominados “acordos da vergoña” pactados entre Fiscalía e imputados que este martes comezaron a tomar forma na Audiencia Provincial.