Os deputados lucenses do Grupo Popular no Congreso, Jaime De Olano, Francisco Conde e Cristina Abades, acompañados da presidenta provincial do partido, Elena Candia, acusaron este luns ao Goberno central de “incumprir” os seus acordos con Lugo, “renunciar ás variantes” necesarias para conectar a provincia á alta velocidade e “investir só dous de cada cinco euros orzados” nas infraestruturas galegas.
“Seguimos sendo a cidade peor conectada de Galicia, necesitamos que se recuperen as frecuencias e non queremos renunciar nin ás variantes con Ourense, nin á A-56 (Lugo-Ourense), nin á A-74 (Autovía da Mariña), nin á A-76 (Ponferrada-Ourense)”, comezou dicindo, nunha breve intervención introductoria, a presidenta provincial do PP de Lugo, Elena Candia, a primeira en tomar a palabra na rolda de prensa convocada polos populares fronte á estación de tren da capital lucense.
O portavoz adxunto do Grupo Popular no Congreso dos Deputados, Jaime De Olano, foi o seguinte en intervir e acusou ao Executivo central de “non ter a máis mínima intención” de acometer as obras para a construción da Autovía da Mariña, nin de favorecer a conexión por estrada da provincia de Lugo coa meseta, operativa tan só, puntualizou, “nun 20% a través da A-6” coa reposición de “un só carril” nos viadutos de Ou Castro.
Tamén afeou De Olano durante a súa intervención ante os medios a actitude do presidente da Deputación de Lugo, o socialista José Tomé, tras a visita a Galicia realizada polo ministro de Transportes, Óscar Puente, para anunciar, indicou, que “Lugo quedaba fóra do Corredor Atlántico de transporte de mercadorías e da alta velocidade”.
“Non se que lle causa tanta felicidade ao señor Tomé nin que lles fai tan felices aos socialistas galegos. Non son de recibo as palabras do señor Tomei hai dous días afirmando que os lucenses estariamos conectados con Ourense en 40 minutos. Iso é mentira. O señor Tomé mente aos lucenses e rise deles cando afirma semellante barbaridade”, manifestou.
Jaime De Olano culminou a súa intervención asegurando que a situación na que se atopa a provincia de Lugo en materia de infraestruturas non é diferente á que se vive no resto da comunidade, xa que, asegurou, “as empresas públicas do Estado tan só investiron en Galicia dous euros de cada cinco que orzaron” segundo os últimos datos dispoñibles de execución orzamentaria, correspondentes ao exercicio de 2022.
INICIATIVA PARA ALTRI
O deputado provincial, Francisco Conde, adiantou tamén en rolda de prensa que o Grupo Popular defenderá este martes na Comisión de Industria e Turismo do Congreso dos Deputados unha proposición para “impulsar” o proxecto da fábrica de fibras téxtiles de Altri en Palas de Rei e garantir a súa viabilidade.
Unha iniciativa, explicou, formulada para instar o Goberno dirixido por Pedro Sánchez a “garantir o acceso aos fondos europeos” e a “construír a subestación eléctrica que precisa Altri para desenvolver o seu proxecto”.
“É unha iniciativa para que o Goberno poida dar pasos concretos e aproveite esta enorme oportunidade para vertebrar o territorio creando máis de 2.500 postos de traballo directos e indirectos e abrindo oportunidades para o rural”, explicou Conde, que apelou ao “diálogo” e a “a sensatez” para garantir a viabilidade dun proxecto que deberá cumprir, puntualizou, “todas as normativas ambientais e de impacto territorial”.
Así mesmo, o PP lucense solicitou tamén ao Goberno central durante a intervención da deputada provincial, Cristina Abades, a adopción de “medidas de mantemento das estradas nacionais nos accesos á cidade de Lugo.
A REPOSTA DE TOMÉ
O presidente da Deputación de Lugo, o socialista José Tomé, censurou as críticas vertidas polo PP e reivindicou que neste momento realízase “o maior investimento da historia de ferrocarril na provincia de Lugo”, con 550 millóns, para modernizar a vía Ourense-Lugo.
Tomé advertiu que se Candia tivese “un pouco de vergoña” non adoptaría esta actitude, á vez que reivindicou o investimento en marcha para modernizar “toda a vía de Ourense a Monforte”. “Houbo unha montaña que se derrubou en Os Peares e que atrasa a obra, loxicamente, pero está a facerse e hai un investimento de 550 millóns”, defendeu.
Tomei contrapuxo este investimento cos pasos dados cando gobernaba o popular Mariano Rajoy en España e salientou que “mesmo o Tribunal de Contas estatal” certificou que pararan ” totalmente as obras do AVE a Galicia”. En fronte, defendeu que, con Pedro Sánchez na Moncloa, volvéronse ” a reactivar” e chegou a alta velocidade a Ourense.
“Resulta que vai falar quen menos ten que falar”, continuou o dirixente socialista, antes de recalcar que o arranxo da vía Ourense-Lugo o que vai permitir é que os lucenses poidan chegar “no mesmo tren a Madrid que os de Vigo e os da Coruña”.
Reafirmouse que mellorarán os tempos. “Imos ter alta velocidade, pero non de grao 300, senón o de 200 e unha media de 160 quilómetros por hora. É moi fácil facer a regra de tres e ver o tempo que levará chegar, matemática pura. Chegar moito antes a Ourense para estar a esperar polos que veñen da Coruña e de Vigo para coller o mesmo tren… Home si, é importante tomar un café na estación de Ourense, pero o importante é que cheguemos cos da Coruña e Vigo no mesmo AVE a Madrid e poderémolo facer”, recalcou.
