O morcego máis grande atopado en Galicia rexistrouse nas Insuas do Miño, trátase dunha femia de nóctulo grande, unha especie migratoria que ten a marca de distancia de migración para esta especie en Europa.
Así o informou a Deputación de Lugo que, como propietaria das Insuas do Miño, financia os traballos de estudo e seguimento desta especie que desenvolve desde o ano 2015 Morcegos de Galicia, en colaboración coa Asociación Galega de Custodia do Territorio.
O achado foi nunha visita dun grupo de escolares de 5º de Primaria do colexio Andaina da Coruña, que visitaron o lugar para coñecer o proxecto. Na revisión realizada por Morcegos de Galicia e o colexio Andaina atoparon un pequeno grupo, formado por un macho e dúas femias, nunha caixa do refuxio.
SEMANA SANTA DE VIVEIRO
Por outra banda, a institución provincial detallou que colabora coa Semana Santa de Viveiro cunha achega de 25.000 euros, desde o “convencemento” de que é “unha obrigación” para conservar o patrimonio e as tradicións.
“Unha herdanza moi rica que temos que manter viva, pero tamén unha fonte de desenvolvemento para Viveiro e para o resto da comarca e da provincia”, detallou a deputada provincial pola comarca da Mariña, Carmela López.
