Axentes da Policía Nacional adscritos á Comisaría Provincial de Lugo detiveron a un home como presunto autor dun delito de tráfico de drogas, co que desarticularon un punto de venda de sustancias estupefacientes na cidade.

Os axentes encargados da investigación de delitos relacionados coa Saúde Pública foron informados dunha trasfega de persoas alleas ao barrio que deambulaban pola zona.

As primeiras pescudas permitiron detectar que un punto de venda de sustancias estupefacientes que fora desarticulado anteriormente estaba de novo activo. Por mor desta información, os axentes estableceron un dispositivo para a comprobación e verificación dos feitos, procedendo á detención dunha persoa e incautando varias doses de cocaína e diñeiro procedente das vendas realizadas.