A Policía Local de Lugo, durante o dispositivo especial polo mercado do Parque da Milagrosa, levantou o martes 26 expedientes sancionadores ao detectar que outros tantos vehículos non presentaran a tempo a ITV. Os seus titulares enfróntanse a sancións de 200 euros.
Segundo o parte de incidencias do corpo municipal, trátase do dispositivo para proporcionar seguridade no mercadillo, que tamén permitiu impor tres multas, con sanción de 600 euros, por ocupación non autorizada do espazo público para a venda ambulante.
Ademais destas sancións, a Policía Local detectou a un vehículo que carecía de seguro obrigatorio, polo que se abriu expediente sancionador cunha posible multa de 1.500 euros.
Por outra banda, efectivos do Grupo Operativo Nocturno denunciaron na madrugada do martes a un local de lecer nocturno da rúa do Miño, conforme á normativa de espectáculos públicos, porque exercía a súa actividade coas portas abertas, o que facía que emitise cara ao exterior elevados niveis de ruído.
