Efectivos da Policía Local de Lugo auxiliaron este fin de semana a dous mozos feridos en pelexas rexistradas nas madrugadas do sábado e do domingo en distintos puntos da cidade.
En concreto, na madrugada do sábado unha patrulla en servizo na Rolda da Muralla, en confluencia coa rúa Santiago, observou a unha persoa tirada no chan e rodeada de varias persoas, que presentaba un forte golpe na cabeza.
Os axentes entrevistáronse cun amigo do ferido, que lles contou que momentos antes discutira cunha persoa por motivos relacionados co fútbol e que, durante a discusión empuxaron ao seu amigo, provocando que caese ao chan.
Mentres que unha patrulla auxiliaba ao ferido, que foi trasladado ao HULA en ambulancia, outra procedeu á localización e identificación do presunto autor da agresión. Este manifestoulles que, antes do empuxón, a vítima agarrárao polo pescozo. Os axentes recolleron datos de todas as testemuñas e remitiron a información á autoridade xudicial.
Posteriormente, na madrugada do domingo, outra patrulla de servizo na Rolda da Muralla observou como un gran número de persoas aproximábanse a un mozo tendido no chan na rúa Merlo. O home manifestou que momentos antes fora agredido por unha persoa que se atopaba nas proximidades.
