A alcaldesa de Lugo, Lara Méndez, asegurou que o Partido Socialista “está preparado” para unhas eleccións autonómicas e sinalou que se o presidente da Xunta, Alfonso Rueda, non as convoca de maneira anticipada é porque “non ten garantida” a maioría do Partido Popular.
“Isto de non acabar os mandatos só obedece a ver unha oportunidade electoral e, por tanto, se non fai esa convocatoria anticipada é porque non ten garantida esa maioría do Partido Popular a falta de poder ter interlocutores cos que poder chegar a acordos”, dixo a rexedora coincidindo co pleno municipal celebrado este xoves. Fíxoo en alusión a unhas declaracións realizadas o mércores polo presidente do PP galego nas que afastaba a hipótese dun anticipo dos comicios galegos.
No seu discurso, na reunión da xunta directiva do PPdeG celebrada en Santiago, o responsable do Executivo galego tamén aproveitou para reivindicar a “estabilidade” que achega a maioría absoluta dos populares en Galicia, onde, segundo recalcou, continuarase “gobernando“ de acordo co mandato cidadán.
Rueda é “quen ten a potestade para adiantalas ou non”, lembrou Méndez, quen engadiu que “se non o fai é porque non o ve nada claro“, tras recalcar que “en todo caso, o Partido Socialista está preparado para cando así o decida”.
