O goberno municipal de Lugo recibiu a notificación de que hai vía libre para continuar co plan para derrubar as torres do Garañón, tendo en conta que o xulgado desestimou paralizar de forma cautelar a demolición á espera dunha resolución sobre a responsabilidade patrimonial. Nesta mesma xornada, a alcaldesa, Lara Méndez, confirmara que había unha orde de paralizar o derrube a raíz do recurso do promotor. Apuntaba en todo caso que esperaba que a solución sobre as medidas cautelares fose “cuestión de días”. “Esperemos que se resolva como a vez anterior –en referencia ao de Banco Santander– e podamos seguir co gran obxectivo que é demoler O Garañón“, recalcou, en relación a unha resolución xudicial que se produciu hoxe finalmente, segundo as fontes consultadas por Europa Press. A alcaldesa, o concelleiro de Urbanismo, Álvaro Santos, e un representante da empresa que derrubará O Garañón entraron o pasado venres, 21 de abril, na leira para asinar a acta de reformulo da demolición e inicio de obra, que podería comezar nas próximas semanas. Fontes do goberno municipal aseguraron a Europa Press que tiveron a notificación deste último recurso “o mesmo venres”.