Os hostaleiros da cidade de Lugo reclaman máis presenza policial no centro os fins de semana, para evitar altercados e pelexas rueiras sobre todo polas noites.
O presidente da Asociación Provincial de Empresarios de Hostalaría de Lugo, Cheché Real, advertiu que é preciso “extremar a vixilancia e, por tanto, máis presenza física das forzas e corpos de seguridade do Estado e da Policía Local”.
Profunda nesa “necesidade” dunha “maior presenza física nas zonas máis conflitivas e horarios en que pode haber unha maior conflitividade”, segundo denunciou.
Outro aspecto que propugnou é a revisión “das penas para este tipo de delitos, porque é incomprensible e intolerable que esas persoas que cometen agresións con consecuencias dramáticas pasan un día no calabozo e ao día seguinte xa están libres e volven cometer os mesmos feitos”.
Nesta liña, Real obxectou que isto tampouco o entenden na Policía: “E por iso o feito de non meterse en problemas gordos, xa que ven como deteñen a esa xente e logo saen sen problema e cometen os mesmos delitos”.
O empresario lucense insistiu en que é precisa “esa maior presenza policial de face a previr”, porque “o importante non é desfacer unha disputa senón procurar que non se cometa”.
