Lara Méndez apunta a “mozos” e a “problemas de saúde mental” polos altercados e pelexas na cidade

O PP pide a Lara Méndez presencia policial permanente nas zonas de lecer lucense e cámaras de vixilancia

A alcaldesa de Lugo, Lara Méndez, recoñeceu este mércores un “incremento” de altercados e “pelexas rueiras” no centro da cidade, sobre todo, durante os fins de semana, declaracións que fixo despois de que fosen detidas sete persoas por unha liorta o día de Fin de Ano e de que este fin de semana tivese lugar outra pelexa na Praza de Santa María.

Así, a rexedora lucense admitiu que “é unha realidade este incremento de altercados na rúa, de pelexas rueiras producidas por mozos”. “De entrada, hai que condenar todo acto violento e pór o foco onde hai que polo e é que estas actitudes se incrementaron despois da pandemia, agora que se fala tamén moito da saúde mental, da problemática de como se xestiona esta postpandemia”, manifestou.

Méndez puntualizou que este é “un tema que se tratou na xunta de seguridade” que se celebrou este mércores, á que acudiu a subdelegada do Goberno en Lugo, Isabel Rodríguez.  A rexedora lucense indicou que se abordou todo aquilo que sucede nas rúas da cidade e porase máis o foco no feito de que se están incrementando o número de denuncias que se producen durante a noite os fins de semana. Méndez aseverou que, por parte do Concello de Lugo, incídese ” moito no peche de locais problemáticos ou onde se produciron altercados”.

Así, seguirán na liña de “ser moi esixentes no cumprimento da normativa dos locais“, comprometeu, á vez que se ampliará a colaboración coa Policía Nacional para manter a orde pública nas rúas e seguirase incidindo nos operativos conxuntos coa Policía Local.

AMEIJIDE

Pola súa banda, o concelleiro popular Antonio Ameijide reclamou a Lara Méndez que aclare “por que non houbo unha rápida resposta policial” e solicita presenza policial permanente nas zonas de lecer lucense e cámaras de vixilancia.

Os populares fan estas peticións “tras comprobar o aumento de pelexas na noite lucense” e, por iso, tamén solicita información dos acordos da xunta local de seguridade para garantir a seguridade nos barrios como o da Milagrosa. “A deriva que está a tomar Lugo nos últimos meses superou o límite e corre o risco de deixar de ser esa cidade tranquila e amable de sempre, a ser un lugar no que os cidadáns camiñen con medo por certas rúas”, advertiron os populares.