A xunta de goberno da Deputación de Lugo aprobou este venres a adxudicación do contrato para a publicación de dúas novas publicacións sobre o patrimonio románico da provincia de Lugo, centradas na Ulloa, Os Ancares, O Courel e a comarca de Sarria.
Esta acción, explicou a institución provincial, busca favorecer a promoción deste estilo arquitectónico como “factor importante” para dinamizar o sector turístico.
Así, a Deputación avanzou que editará 1.000 exemplares dunha guía sobre o románico da comarca da Ulloa e outros 1.000 dunha centrada na zona dos Ancares, O Courel, e a comarca de Sarria, así como un total de 2.000 trípticos complementarios a estas publicacións.
Nunha nota de prensa, detallou que o contrato foi adxudicado a Producións 60 Refachos S.L. por 36.179 euros e un prazo de entrega de 11 días. “Estas dúas guías forman parte dun proxecto máis amplo, composto de catro volumes que farán un percorrido por este estilo arquitectónico ao longo de toda a provincia”, explicou a portavoz socialista do goberno, Pilar García Porto.
Así, García Porto destacou que a Deputación ten publicada a guía correspondente á Ribeira Sacra e durante este 2023 esperan sacar as correspondentes ás comarcas de Lugo, A Chaira e A Mariña para “completar a serie”.
O autor destas publicacións, que están en galego, castelán e inglés, é Miguel Mendoza e a ilustración corre a cargo das fotografías de Pepe Tejero e de Roberto Díaz.
