A alcaldesa de Lugo, Lara Méndez, anunciou que este mércores se adxudicará, en xunta de goberno local, o contrato para o derrubamento do edificio do Garañón, situado no centro da cidade, para poder crear unha zona verde.
Segundo trasladou o Concello nun comunicado, trátase dun contrato mixto para a redacción do proxecto, a dirección facultativa de obra e a demolición do Garañón a Xestión Ambiental de Contratas por un importe de 578.035 euros.
A empresa adxudicataria disporá de 30 días naturais máximopara presentar o proxecto de derruba e, posteriormente, doutros 120 para executar os labores correspondentes.
Méndez sinalou que con esta actuación avánzase en “dar resposta a unha demanda social de crear un novo pulmón verde na cidade que dea continuidade ás Costas do Parque e ao parque de Rosalía de Castro”.
Así mesmo, fixo fincapé en que as bases do contrato contemplan a obrigatoriedade de realizar un seguimento da obra cunha periodicidade mínima de 15 días, coa intención de controlar o progreso das tarefas e verificar diferentes aspectos.
