Os establecementos de hostalaría en Lugo sumáronse á acción de protesta convocada en varios puntos de España co fin de visibilizar, ás escuras, a situación difícil que atravesa o sector pola subida da luz e os problemas que se arrastran coa crise de prezos.

Segundo os datos que manexa a Federación de Hostalaría de Galicia e a Confederación Empresarial de Hostalaría de España, a enerxía representa entre o 6% e o 8% dos custos dun negocio, polo que unha subida dun terzo pode provocar un aumento de entre o 2% e 3% dos gastos fixos nas empresas do sector.

O custo medio da enerxía nun local de restauración pode situarse nunha media de entre 3.000 e 6.000 euros. A porcentaxe de subida do recibo da electricidade estivo na contorna do 40%, pero advertiu de que “se chegaron a ver casos de incrementos do triplo nas facturas en relación ao ano pasado”.

Ante esta situación, os hostaleiros lamentan a “gran falta de axudas e apoios para a reconversión de instalacións e equipos” e reprochan que “tampouco se dispuxo de axudas para a implantación de fontes de enerxía renovables e sistemas de autoconsumo”.

PARTICIPACIÓN

A Federación da Hostalaría de Galicia animou a todos os locais do sector de Galicia a participar para simbolizar, cunhas velas, que o sector se vai a quedar así, “a dúas veas”. Tratábase, pois, de mostrar a “extrema gravidade que atravesa” o sector.

“O sector fixo melloras na eficiencia do consumo, pero non foron suficientes. Tampouco houbo axudas para a reconversión das instalacións de equipos”, constatou o presidente da federación, Cheché Real.

Os hostaleiros propoñen modificar o cálculo das tarifas, dispor dun estatuto similar ao do consumidor electrointensivo, aprobar bonos eléctricos cos remanentes que quedaron do Covid que ían dirixidos ao sector e que non se empregaron e “rebaixar os impostos eléctricos”, entre as súas propostas.