A CIG realizou este luns a súa primeira concentración para demandar a reunión da comisión negociadora do convenio do sector de transporte de viaxeiros por estrada da provincia de Lugo.
Segundo informou nun comunicado, a central busca retomar a negociación do convenio sectorial de viaxeiros na provincia de Lugo, para loitar contra “a precarización e perdida do poder adquisitivo” do seu persoal.
Este convenio tiña vixencia ata o ano 2015. Con posterioridade ao conflito xerado na folga do sector a nivel galego polos novos contratos produciuse un acordo marco para o sector en 2017 que determinou a actualización das táboas salariais deste convenio para os anos 2016 e 2017, segundo apunta a organización.
Despois, en marzo de 2019 produciuse a constitución da mesa negociadora e desde ese momento non se avanzou e a CIG denuncia “parálise”.
Desta forma, remarca que no ámbito social é “destacable” a acumulación do diferencial negativo para o persoal do sector do IPC reais dos anos 2018 a 2021, que supoñen un 8,5% de perdida do poder adquisitivo nos salarios e que, na actual situación “ten que ser un claro obxectivo a superar” no proceso da negociación colectiva.
Fronte a isto, en palabras da CIG, o persoal de sector “pode contrastar” que existe unha “clara indiferenza das partes da comisión negociadora para que o convenio evolucione”.
