O Concello de Friol mantén activa a recompensa de 6.000 euros que se ofreceu a aquel que atopase o veciño da parroquia de Carballo, José Luís Iglesias, en paradoiro descoñecido desde hai mes e medio.
O alcalde de Friol, José Ángel Santos, asegurou que os labores de procura “se realizan con máis intensidade o fin de semana, e entre semana quen quere facelo tamén o fai”.
No entanto, insistiu en que “de maneira máis organizada e intensa séguese co operativo o sábado e os domingos, pero ata a data non hai nada novo que contar”, sinala Santos. Ata o momento “non hai nin un indicio, nin unha proba que indique que poida estar nunha zona en concreto”.
O alcalde de Friol constatou que a “familia se atopa esnaquizada porque pasa o tempo e non aparece José Luís”. “A esperanza é o último que se perde e imos ser os últimos en perdela”, desexou.
Así, José Ángel Santos puntualizou que “segue activa a recompensa”, de seis mil euros que achegan tanto o Concello como a familia para dar con José Luís Iglesias, coa esperanza de que isto “leve a colaborar a máis xente, sobre todo xente formada neste tipo de operativos”, conclúe.
