A Federación de Asociacións de Veciños de Lugo distinguirá co V de Veciño ao vicepresidente segundo da Xunta, Diego Calvo, e ao secretario xeral dos socialistas galegos e presidente da Deputación da Coruña, Valentín González Formoso.
Igualmente recoñecerase nesta 20 edición á portavoz socialista na Deputación de Lugo, Pilar García Porto, ao senador do PSOE, César Mogo, ou ao dono do restaurante Botafumeiro de Barcelona Moncho Neira, entre outros.
Uns recoñecementos que se trasladarán o “día do Veciño”, que este ano se celebrará o domingo 23 de outubro, no Pazo de Feiras e Congresos, ao que agardan que acudan ao redor de 4.500 persoas nunha comida onde primarán os produtos de Lugo.
Os actos presentáronse nun dos xardíns da deputación, coa presenza do presidente provincial, José TomÉ, a alcaldesa de Lugo, Lara Méndez, o delegado da Xunta, Javier Arias, e o presidente da Federación de Asociacións de Veciños da provincia, Jesús Vázquez.
Vázquez subliñou que “hai tantas asociacións en Lugo, como no resto de Galicia xunto”, con preto de 350, a unha media de “unha ou dúas asociacións que se incorporan ao mes”.
O presidente do movemento veciñal presumiu de que “nos achegamos a ese obxectivo das 350 asociacións, cunha media de sesenta ou setenta socios, co que estariamos a falar de máis de 20 mil asociados na provincia de Lugo”.
O domingo 23 iniciarase cun partido de fútbol entre xornalistas, políticos e membros das asociacións veciñais, ás doce e media actuacións musicais, ás 14,00 horas a comida, ás 16,00 horas farase entrega do V de Veciños e rematará ás 18,30 horas coa actuación de Treixadura.
