O Concello de Lugo anunciou este martes que concede un prazo improrrogable ao propietario do inmoble da Rúa Miño cuxo tellado se afundiu este luns, para que presente un proxecto de recuperación antes de que o consistorio interveña subsidiariamente.
O persoal técnico da área de Sustentabilidade Urbana acordaba na mañá deste martes a urxencia da medida, despois de que na inspección realizada, a arquitecta municipal observase que o interior e a cuberta do edificio atópanse comprometidas na situación actual, aínda que nin a fachada nin as casas lindeiras corren perigo.
O portavoz do Executivo local, Miguel Fernández, lembrou que o departamento de Xestión Urbanística mantén aberto un expediente contra os titulares da edificación, aos que se lles trasladaron varios requirimentos para que procedesen á corrección das deficiencias detectadas durante a inspección realizada polo persoal municipal o pasado mes de febreiro.
“Seguindo o procedemento legal establecido, a Administración Local impúxolle xa unha multa coercitiva por importe de 1.000 euros tras a cal o dono adoptou unha serie de medidas cautelares que resultaron insuficientes, de maneira que debe actuar cunha obra de maior envergadura que garanta tanto o mantemento da vivenda en condicións idóneas como a seguridade cidadá”, explicou o portavoz.
Miguel Fernández incidiu en que o labor de conservación corresponde ás persoas titulares dos inmobles e que, de non respectarse, implica a intervención institucional, á vez que lembrou tamén que a duración destes procedementos garda unha estreita relación coa actitude colaborativa que mostren ao respecto e que, nalgúns casos, leva ter que esgotar todas as vías administrativas e chegar á xudicial, como o Concello viuse obrigado a facer, por exemplo, no caso do inmoble número 48 da Rolda dá Muralla, para poder intervir de forma subsidiaria.
