O Concello de Lugo, en colaboración coa hostalaría da cidade, emprende unha campaña “por un consumo responsable de alcol”, principalmente, en menores.

A campaña foi bautizada como ‘Á túa saúde, brindemos por un consumo e unha dispensación responsable de alcol’. A alcaldesa de Lugo, Lara Méndez, acompañada de hostaleiros, entre eles o presidente da Asociación Provincial, Cheché Real, lanzou este programa desde a Praza do Campo, en plena zona vella da cidade.

Alí, Méndez precisou que esta campaña vai dirixida aos “máis novos” e busca “concienciar e sensibilizar”, ademais de “dar alternativas de lecer para que os nenos e as nenas non se inicien no consumo de alcol a idades tan temperás”.

A alcaldesa chamou a atención sobre “un dato alarmante”, xa que “a idade media de inicio ao alcol é de 13,4 anos”. “Falamos de nenos e nenas que están no seu desenvolvemento principal e o consumo de alcol a esas idades tan temperás poden abocar a outros consumos menos socializados”, alertou.

Méndez insistiu en que o que se persegue é “concienciar a través de cartelaría”, que se situará nos locais de hostalaría, e “cuñas” co obxectivo de concienciarse “desde o ámbito da familia e desde o ámbito social” no rexeitamento ao “abusivo consumo de alcol”.

Pola súa banda, Cheché Real cualificou a campaña de “moi acertada”, apresurándose en deixar claro que o consumo de alcol “entre ‘pícaros’, non se pode consentir”. Nos carteis que salpicarán toda a cidade pódese ler, ‘que non che dean a chapa, o consumo excesivo de alcol nunca, nunca, nunca ten beneficios’.