A Deputación de Lugo informou este xoves de que a empresa Naturgy Generatio SLU, titular dunha concesión para o aproveitamento de auga no río Miño para a produción de enerxía eléctrica, comunicou que ten previsto realizar a partir de outubro obras de mantemento no selo inferior das comportas da presa dos Peares, o que implicará un descenso do nivel da auga.
Isto, apuntou a institución provincial, imposibilita que as embarcacións que cobren a ruta fluvial en catamarán polo Miño, que parte do Saviñao, poidan navegar con seguridade, polo que o servizo suspenderase a partir do día 9 de outubro, quedando operativos os catamaráns polo Sil, que saen do embarcadoiro Ponche do Sil, en Monforte de Lemos.
A Deputación porase en contacto coas persoas que xa fixesen o seu reserva na ruta polo Miño desde o 10 de outubro ata finais de ano, informándoas da situación e facilitándolles alternativas, como adiantar a data da viaxe ou realizar a ruta polo Sil.
O percorrido polo Miño funcionará con normalidade ata o 9 outubro, momento no que quedarán interrompidos as viaxes. En concreto, en setembro o servizo funcionará durante toda a semana, con viaxes de luns a domingo. En outubro funcionará os fins de semana dos días 1 e 2 e 8 e 9.
