A protectora de animais de Lugo necesita un cambio “urxente” de localización, tal e como expresou o presidente da Sociedade Protectora lucense, Alberto Losada, que apuntou que “o espazo non chega para que os animais estean realmente a gusto”, dada a alta taxa de abandonos que sofre Lugo.
En concreto, Losada estima que a protectora recolle a unha media de entre 60 e 70 animais mensuais, “o que provoca vernos a finais de ano con máis de 300 cans e gatos sen donos”, lamenta. A pesar das innumerables campañas de concienciación, na capital lucense non notan que as cifras baixen. Nos últimos anos non houbo variacións e o número de abandonos “mantense lineal”, dixo.
Tras ver que o espazo é cada vez máis reducido, e que o número de animais acollidos segue aumentado, a protectora solicitou en varias ocasións os permisos para aumentar o seu tamaño, pero a proximidade a un rego provoca a negativa constante da Confederación Hidrográfica Miño-Sil.
Ante esta situación, o Concello de Lugo, en 2019, propuxo á Deputación o cambio de localización da protectora e aproveitar as instalacións do vello matadoiro, en San Xoán de Pena, para dar cabida a unhas novas. Desde aquel entón os avances foron máis ben poucos.
O concello xa conta con 1,8 millóns de euros para acometer a reforma, pero aproveitaron para solicitar unhas axudas europeas que poderían aumentar o orzamento e facer, así, un proxecto “moito máis ambicioso”. “Non podemos falar de datas, pero se temos o compromiso do executivo local en canto a que se non chegan estas axudas, o proxecto sairá igualmente cara a adiante co orzado”, asegura Losada.
Pronto tamén entrará en vigor a Lei de protección do Benestar Animal, unha medida nacional que aplauden desde a dirección da protectora lucense e coa que cren que se axudará a “sensibilizar á sociedade á vez que se castigará en maior medida os malos tratos animais”.
