O 45% dos emigrantes españois en Cuba a principios do século XX foron galegos, un dato que ofrecía este venres en Lugo o embaixador cubano, Marcelino Medina. Nun acto na Deputación de Lugo, Medina asinaba no libro de ouro provincial e logo comparecía acompañado do presidente provincial, José Tomé.
“O 45% da emigración española a principios do século XX foi galega, e é un pouco o que me fai explicar ao meu porque os cubanos lle dicimos a todos os españois que son galegos, porque realmente era unha gran maioría e deixaron unha gran pegada na historia, na economía e na cultura de Cuba, aínda que diría que en todos os ámbitos do noso país”, debullaba o embaixador.
Marcelino Medida destacou que “hai unha gran identidade afectiva, unha gran identidade familiar tamén porque os vínculos familiares son moi profundos, pero tamén de amizade e de relacións económicas ao longo dos anos”.
“Hai un tecido empresarial en Galicia e particularmente en Lugo que teñen negocios con Cuba, que están interesados, unha vez saídos da pandemia, de ir a niveis superiores (de negocio) e de recuperar o tempo perdido”, sostivo.
En tanto, o presidente da Deputación de Lugo, José Tomé, agradecía a presenza do embaixador e iniciaba o seu discurso proclamando que “un galego e un cubano nunca esgotan os temas de conversación”, chanceaba tamén ante a cónsul en Galicia. Tomé puña o acento en “España como porta privilexiada en Europa para os países irmáns do outro lado do Atlántico e aí Galicia e Lugo poden xogar un papel importante”.
“Creo que o futuro da Unión Europea pasa por reequilibrar as súas políticas internacionais, por revisar as súas relacións con outros espazos políticos, económicos e xeográficos, e España e Galicia atópanse nunha posición estratéxica para axudar ás autoridades europeas a aproveitar o potencial que se deriva das relacións con América Latina e os países do Caribe”, expuxo.
