O presidente da Deputación de Lugo, José Tomé, mostrou a súa confianza en que do Debate sobre o Estado da Nación saian fortalecidas “aínda máis” as políticas sociais do Goberno central. Tomé recoñeceu que en dito debate “se vai falar de política xeral e do Estado”, polo que espera que apenas teña eco en canto a investimentos para a provincia de Lugo.

No entanto, o xefe do executivo provincial destacou que “o que ten comprometido o presidente (Pedro Sánchez), a través do Ministro da Presidencia, é que se van tomar novas medidas”. “Sobre todo destinadas a axudar ás persoas a pasar as dificultades polas que estamos a pasar agora”, indicou.

“Por tanto, son políticas sociais as que hoxe o presidente vai expor no Parlamento pola mañá e despois, pola tarde, é o debate cos grupos parlamentarios”, pormenorizou. Tomé insistiu en que “hoxe non vai haber anuncios de obras porque non toca iso”. Finalmente, destacou que as medidas que se adopten tras este debate sobre o Estado da Nación van ser “moi importantes para a cidadanía”.