Aena nomeou ao lucense Marcos Díaz González novo director do Aeroporto de Santiago-Rosalía de Castro en substitución de Ricardo López Navarro, que dirixía o aeródromo desde o ano 2013.
Díaz González, que asumirá as súas funcións a partir do 1 de xullo, é enxeñeiro aeronáutico pola Universidade Politécnica de Madrid e realizou un máster universitario en Dirección de Empresas (MBA) e o Programa de Desenvolvemento Directivo (PDD) do IESE.
Incorporouse a Aena en 2005 e desde entón ocupou cargos de diversa responsabilidade nos aeroportos de Menorca e Tenerife Sur. Ata agora, segundo informa a empresa pública, era director do Aeroporto de Zaragoza.
Na súa etapa á fronte do aeródromo aragonés impulsou o desenvolvemento da infraestrutura ata conseguir “un importante crecemento da carga aérea”, o que situou este aeroporto en segundo lugar na rede de Aena por volume de carga.
Ademais, baixo a súa dirección, o Aeroporto de Zaragoza obtivo o premio ‘ASQ’ (Airport Service Quality) que concede o Consello Internacional de Aeroportos (ACI) pola calidade de servizo ao pasaxeiro.
