As pelexas e os actos vandálicos sementan de “terror” o centro da cidade de Lugo os fins de semana, segundo denuncia a asociación Lugo Monumental. Por iso, o seu presidente, Luís Latorre, reclama unha “maior presenza policial” polas rúas da zona vella e “cámaras de vixilancia”.
Son unha serie de incidentes os fins de semana á que non é allea o resto da cidade, matiza Latorre, quen despraza tamén esas pelexas á Avenida de Ramón Ferreiro. “Nós estamos aburridos de repetir que a única solución para isto é a presenza policial e a instalación de cámaras de seguridade de circuíto pechado”, aprema.
Trataríase, en definitiva, de conseguir identificar os responsables destas pelexas e destes actos vandálicos que sacoden á cidade as noites de “practicamente” todas as fins de semana. “É un absurdo que unha persoa non poida andar pola noite sen ter medo a pelexas. A situación non é sustentable. Pedimos máis policía e cámaras de seguridade”, volve reivindicar.
Latorre ten claro que o “primeiro son as persoas”, en canto a evitar estas condutas delituosas aínda que tamén preservar “o patrimonio de todos”. “Non só se trata de multar por mear contra a Catedral, senón das desfeitas que se causan como pintadas ou outros actos vandálicos no centro de Lugo, que é o pan de cada día. É unha cousa grave que hai que atallar canto antes”, avisa finalmente o presidente de Lugo Monumental.
