O real decreto aprobado hoxe polo Consello de Ministras, a proposta do ministro de Agricultura, Pesca e Alimentación, Luis Planas Puchades, estabelece a obrigatoriedade de que todos os lácteos detallen no seu etiquetado cal é a procedencia dos produtos. O Goberno atende así unha das grandes reivindicacións do sector gandeiro e dos sindicatos agrarios galegos e lucenses.
O sector dos lácteos levaba tempo agardando por esta iniciativa, recollida no acordo asinado hai tres anos. Un dos piares daquel punto de encontro era a necesidade de garantir información veraz o consumidor acerca do lugar de procedencia dos produtos. Co cambio de Goberno, esta medida colleu pulo e en tres meses acadou rango legal, sendo a primeira vez que España aproba regulación sobre etiquetado sen mandado europeo.
Gandeiros e sindicatos do sector dos lácteos denunciaron reiteradamente o prexuízo que lles ocasionaba a entrada masiva de leite a baixo prezo, procedente doutros países europeos como Francia e Portugal. Ese leite era envasado no país, de xeito que o consumidor compraba leite e derivados lácteos descoñecendo que a súa orixe non era galega.
