O grupo provincial do PSdeG en Lugo presentou unha moción a debater no pleno da Deputación para rexeitar a invasión de Ucraína e mostrar o seu respaldo ás vítimas da guerra. Ademais, os socialistas lucenses quixeron mostrar o seu respaldo á acción do Goberno central, do que destacan que “desde o primeiro momento” actuou “seguindo a liña das medidas propostas pola Unión Europea e a OTAN”.
Nesta mesma liña explicaron que a axuda á poboación civil e o envío de material militar para a defensa de Ucraína son os “eixos da resposta europea”, xunto coas sancións económicas ao “réxime de Moscova”.
Deste xeito, o grupo provincial socialista rexeita a guerra e expón o seu desexo de axudar á poboación civil ucraína, mentres lembra que ao longo da historia apostaron sempre pola “resolución pacífica dos conflitos” a través do diálogo, pero tamén pola necesidade de sancionar o “incumprimento do dereito internacional”.
Nesta moción tamén reclaman á Xunta un “plan de choque” para paliar o impacto económico da guerra nas empresas e nas familias galegas e insta a administración autonómica a que empregue, na medida da súa capacidade orzamentaria, recursos propios para desenvolver medidas concretas de axuda destinadas a mitigar a situación do pobo ucraíno.
