O municipio lugués de Friol será a sede do bautizado como “Amazon rural”, un proxecto empresarial de venda e repartición de produtos locais a través dunha plataforma en liña. Segundo explicou este xoves o alcalde, José Ángel Santos, a posta en marcha deste proxecto industrial creará entre 20 e 25 postos de traballo.
A iniciativa parte do grupo Envaco, promotores da plataforma ‘Ruralsell’, bautizada como o “Amazon rural” e que está orientada á venda a nivel estatal de produtos locais. O rexedor de Friol incidiu en que este grupo empresarial “está perfectamente asentado en España e Galicia para vender produtos agroalimentarios galegos”.
“Hai un proxecto firme para asentar a base loxística do grupo Envaco no polígono industrial de Friol e iso é unha boa noticia para a provincia de Lugo e para o concello”, asegurou Santos destacou que “á parte de xerar movemento económico, vai xerar postos de traballo e unha boa promoción do concello”. En concreto, segundo o rexedor, o “Amazon rural” contará cunhas instalacións de 1.500 metros cadrados. A súa posta en marcha prevese “para finais do ano que vén”.
