A moza transexual de 23 anos agredida en Lugo ao ser lanzada desde a Muralla de Lugo abandonou a UCI do Hospital Universitario Lucus Augusti (HULA) e xa está en planta, segundo confirmaron fontes hospitalarias a Europa Press.
A muller ingresaba o pasado domingo na unidade de críticos do centro en estado grave, cunha perna rota, varias vértebras fracturadas e unha man fracturada.
Foi un transeúnte que camiñaba polo adarve da Muralla o que, sobre as 7,00 horas, escoitou berros de auxilio e puido localizar o lugar e ver á moza tirada no fondo dun patio interior, co que chamou aos servizos de emerxencias.
Pola súa banda, o delegado do Goberno en Galicia, José Miñones, confirmou este pasado venres que se lle tomará declaración á muller cando se conte con autorización por parte dos médicos.
Preguntando sobre se neste caso existe delito de odio, ao tratarse dunha muller trans, e polos antecedentes do home, Miñones respondeu que “será o xuíz o que decida” sobre estes asuntos.
Fontes consultadas por Europa Press apuntaron que foi a familia a que puxo en coñecemento da Policía Nacional a condición de transexual da muller, feito que “pode ser unha hipótese” do desencadenamento da pelexa que acabou co empuxón desde a Muralla.
Respecto diso, fontes da Policía Nacional apuntaron unicamente que “houbo algo entre eles” que levou a unha pelexa e ao empuxón desde uns 12 metros de altura que acabou coa caída da vítima, á que o presunto autor deixou tirada sen socorrela.
O presunto autor da agresión, foi detido e tras pasar a disposición xudicial o pasado mércores, permanece en liberdade con cargos.