A Deputación de Lugo subscribirá un acordo de colaboración coa Asociación de Mulleres Empresarias da provincia, por un importe de 22.500 euros, destinado a impulsar formación TIC dirixida a este sector. O deputado de Promoción Económica e Social da Deputación de Lugo, Pablo Rivera Capón, informou este venres do acordo, encamiñado a aproximar a estas cidadás e empresarias “ás novas tecnoloxías”.
“Axudará a converter os negocios en espazos máis competitivos no mundo en liña mediante a mellora da web ou o uso das redes sociais e blogues”, destacou. Pablo Rivera enmarcou esta axuda dentro da liña de colaboración da entidade con “o tecido asociativo e empresarial da provincia”.
Ademais, a xunta de goberno tamén deu luz verde á compra dun novo camión para o parque móbil provincial por un importe de preto de 150.000 euros. O vehículo, composto por unha cabeza tractora con semirremolque tipo bañeira, permitirá “seguir mellorando no mantemento e a conservación das estradas provinciais e municipais”, matizou Rivera Capón.
