O Xulgado de instrución número uno de Lugo acordou o arquivo provisional da causa na que se investigaba ao que foi xefe de protocolo da Deputación de Lugo, Juan Carlos Fernández Pulpeiro, por un suposto delito acoso laboral a unha funcionaria. Esta peza deu orixe á Operación Pulpo sobre irregularidades na institución provincial, a penúltima causa na que o que foi líder do PSdeG e presidente desta institución provincial, José Ramón Gómez Besteiro, figura como investigado.
Nun auto con data do 26 de maio de 2021 ao que tivo acceso Europa Press, o actual titular do xulgado Joaquín Brage lembra que desde 2013 e ao longo dos últimos “case oito anos” practicáronse todas as dilixencias necesarias para o esclarecemento dos feitos denunciados sobre un suposto delito de acoso laboral. En concreto, a investigación foi iniciada pola xuíza Pilar de Lara, quen foi apartada polo Consello Xeral do Poder Xudicial (CGPJ) deste xulgado por dilacións indebidas.
A orixe desta causa, conforme sinala o fallo, áchase nunha copia dunha denuncia administrativa presentada por dous funcionarios da Deputación contra o xefe de Servizo de Protocolo, Juan Carlos Fernández Pulpeiro. Unha copia que “se deslizou misteriosamente, por unha persoa que non puido ser identificada, baixo a porta do despacho do PP na Deputación“, formación que integraba a oposición e que presentou a denuncia ante a Fiscalía.
Con todo, o xuíz considera que, unha vez que se practicou unha instrución “non só longuísima no tempo, senón tamén exhaustiva sobre este extremo”, conclúese que “non existen indicios racionais de ningún tipo de actitude de acoso laboral, polo menos con entidade bastante para ter relevancia penal”.óns”.
Preguntada sobre esta decisión xudicial, a defensa de Pulpeiro, exercida polo avogado Juan Carlos López Abad, rexeitou pronunciarse sobre este asunto “ata que non sexa firme”.
FUTURO DE BESTEIRO
A peza que agora se arquiva deu orixe á Operación Pulpo, unha causa que foi separada en diferentes pezas e da que varias xa foron arquivadas. Do mesmo xeito que outras causas que afectaban a Besteiro –como a que investigaba a construción das torres do Garañón e que tamén foi arquivada–, a Operación Pulpo foi iniciada por Pilar de Lara, maxistrada que perdeu a súa praza en Lugo polos atrasos nos seus macrocasos.
Precisamente, nun contexto no que o Partido Socialista de Galicia celebrará a finais deste ano o congreso para elixir á súa nova dirección e ao irse coñecendo o arquivo de diferentes pezas que lle afectan, o nome de José Ramón Gómez Besteiro volve soar para ocupar responsabilidades na organización. Con todo, aínda lle queda unha peza na que está imputado relativo ás axudas ao programa Km0.
