O hospital Lucus Augusti de Lugo vén de participar, xunto co Centro Oncolóxico de Galicia e outros 22 centros hospitalarios do Estado nunha investigación pioneira sobre o cancro de pulmón e que podería facer avanzar o coñecemento sobre unha das enfermidades máis letais ata o momento.
As conclusións do estudo veñen de ser presentadas na Reunión Anual da Asociación Americana de Oncoloxía Médica. En conxunto, a investigación sería a primeira de cantas foron desenvoltos en dar indicios dunha maior esperanza de vida para persoas con este tipo de patoloxía cando se combina a quimioterapia trala cirurxía cun tratamento de inmunoterapia.
Segundo apuntan dende a farmacéutica Roche, tamén implicada no estudo, a investigación tería dado como resultado esa inmunoterapia que, en palabras da mesma fontes, “mellorou a supervivencia libre de enfermidade en máis dun terzo dos pacientes con cancro de pulmón” nas etapas iniciais da enfermidade. “É a primeira e única inmunoterapia que mostra resultados positivos” neste aspecto, aseguran dende a compañía.
O interese desta clase de tratamento inmunoterapéutico estaría, precisamente, en que podería axudar a impedir o rexurdimento da enfermidade unha vez os tumores foron extirpados mediante intervención cirúrxica e, máis adiante, tratados con quimioterapia. Por iso podería tratarse dun estudo pioneiro, en tanto que permitiría aumentar a esperanza de vida dos afectados cunha das patoloxías máis mortais que se coñecen.
