Antes de discutir o control da velutina, o pleno da corporación provincial atravesou intres de lea pola non votación dunha iniciativa de Manuel Martínez, expulsado das filas do PSdeG. Xusto antes do debate da eliminación do pleno de agosto, o deputado díscolo pediu a supresión do resto de plenos da lexislatura para evitar o que caracterizou de pisoteo dos seus dereitos “na loita contra a falta de transparencia e o non cumprimento da lexislación”. En resposta, o presidente da Deputación, Darío Campos, pediulle que non fixera “máis espectáculo” e que non fose “protagonista e personaxe” e procedera a votar a moción.
A continuación procedeuse a un debate polarizado arredor do combate á expansión da avespa asiática. O grupo socialista esixiu á Xunta, como fixera no Concello de Lugo e no resto da provincia, a declaración de praga da velutina. Contou na argumentación co apoio do Bloque Nacionalista Galego, que criticou a posición do Partido Popular no Parlamento de Galicia, que obrigou a derivar as competencias nos concellos, como sucedera coas faixas contralumes.
Dende o Partido Popular, José Ulla asegurou que a potestade da declaración de praga corresponde ao goberno central, e que o trampeo masivo podería afectar a outras especies autóctonas. O asemade rexedor de Rábade dixo que Santos unicamente perseguía un mérito de cara ao partido e ao electorado, e que a proposta non solucionaría o problema. E adiantou que os populares agardarán polo Ministerio para a Transición Ecolóxica ou unha eventual modificación legal.
Santos asegurou que a moción “non é un ataque, senón un chamamento” para atallar un escenario “no que o cidadán está preocupado porque o problema non se soluciona”, como sucedeu coa pataca. O voceiro socialista, chamou a atención sobre os cambios no comportamento da avespa asiática, que comezou a atacar tamén as vides, criticou a descoordinación dos organismos autonómicos, e apuntou a que a declaración de praga desbloquearía os recursos económicos necesarios para o control da velutina.
Finalmente a proposta saíu adiante coa engádega que urxe ao goberno central a intervir e proseguir coa investigación (e que levou á abstención do Partido Popular), outra enmenda para evitar especificar o número de trampas a colocar, e a solicitude de implicación do Consorcio Provincial de Bombeiros auspiciada por Martínez.
