O alcalde de Friol, o popular José Ángel Santos, esixiu este venres ao conselleiro de Medio Rural, José González, que “execute dunha vez por todas” a concentración parcelaria das parroquias de Seoane e Mundín, que “veñen esixindo os veciños e o concello desde hai moitos anos”.
Así, o rexedor dixo que se trata dunha concentración “que é básica para as instalacións gandeiras asentadas na parroquia de Seoane e no núcleo de Gundín”.
“Solicito ao conselleiro de Medio Rural que axilice, dunha vez por todas, a execución da parcelaria mediante decreto”, apremou o rexedor friolense.
Para lograr este obxectivo, o alcalde descarta manter novas reunións. “Xa as tivemos e non frutificaron”, resolveu, tras o que explicou que sabe de “primeira man” que “todos os informes pendentes son favorables e agora está o balón no tellado do conselleiro”.
Nestas aldeas, explicou José Ángel Santos, viven “sobre 75 ou 76 veciños” e a parcelaria “pretende actuar ao redor de 380 hectáreas, a maioría dedicadas a uso agrícola”. Nestes momentos son 24 as explotacións “asentadas” neses lugares de Friol, un 60% delas de leite e un 40% de “carne”.
