A área sanitaria de Lugo mantense con 31 casos activos na xornada deste mércores 10 de xuño. Son os mesmos positivos ca os documentados no día de onte, cando a provincia presentaba unha leve repunta despois de 16 días en descenso ou estabilidade.
O Hospital Universitario Lucus Augusti (HULA) acolle o único paciente ingresado con coronavirus de toda a provincia. Outros 30 están a ser atendidos no seu domicilio.
Ademais, Sanidade informa de que máis de 900 persoas xa superaron a COVID-19 en Lugo, mentres que o número de falecidos segue sendo 28.
GALICIA
A nivel autonómico, os casos baixaron en 27 ata situarse nos 476. A día de hoxe non se rexistra ningún paciente con positivo nas UCI galegas. Quedan, iso si, dez persoas ingresadas en unidades de hospitalización e 466 en seguimento domiciliario.
Ata este mércores, contabilizáronse 10.338 persoas curadas e 618 falecementos, cifra que se mantén invariable dende o mércores da semana pasada.
