A área sanitaria de Lugo presenta este martes 9 de xuño unha leve repunta de casos activos por coronavirus ao contar 31 positivos, fronte aos 30 de onte. Este dato non se traduce nun aumento nas hospitalizacións, xa que só unha persoa continúa ingresada no HULA. Daquela, o novo diagnóstico correspóndese cun paciente que está a ser atendido no seu domicilio.
Así, a área lucense é a única galega na que aumentan os casos activos segundo a información ofrecida pola Consellería de Sanidade. Ocorre tras 16 días de descenso ou estabilidade. No conxunto autonómico, os positivos en activo minguan en nove, ata situarse nos 503.
Na última actualización de datos a nivel galego, o Sergas informa dun só paciente ingresado na UCI, quince en hospitalización e 487 en seguimento domiciliario. Os falecementos mantéñense en 618.
RESIDENCIAS
Por outra banda, non hai cambios na situación das residencias da provincia de Lugo. O Centro de Atención a Persoas con Discapacidade DomusVi de Bóveda é o único que rexistra un usuario con positivo en COVID-19.
