O Partido Popular de Guitiriz anunciou este mércores a ampliación da denuncia presentada contra a alcaldesa socialista, Marisol Morandeira, por presunta falsidade documental, “tras a aparición de nova documentación”.
O portavoz municipal, José Manuel López Rodríguez, explicou que esta decisión se fundamenta en datos oficiais que apuntan a unha posible incompatibilidade entre a presenza da rexedora nun acto institucional fóra de Galicia e a súa suposta asistencia, e mesmo presidencia, dunha xunta de goberno local celebrada ese mesmo día en Guitiriz.
Os feitos remóntanse ao 4 de febreiro de 2026, data na que, segundo a información solicitada, a alcaldesa atopábase en Caldes de Malavella (Xirona) participando nun evento en comisión de servizo. Con todo, existe unha acta municipal desa mesma xornada na que figura como asistente e presidenta da sesión da xunta de goberno.
Desde o grupo popular consideran que esta coincidencia resulta dificilmente compatible e volve xerar dúbidas sobre a veracidade da documentación municipal. Ademais, subliñan que na acta non consta ningún indicio de que a reunión se celebrase de forma telemática, “xa que non se especifica o sistema utilizado, nin a acreditación de identidade dos participantes, nin posibles incidencias técnicas, requisitos esixidos pola normativa vixente neste tipo de sesións”.
O portavoz lembrou que a lexislación limita as reunións telemáticas a supostos excepcionais e esixe garantías formais que, ao seu xuízo, non se reflicten na documentación analizada. Neste sentido, sinalou que, mesmo no caso de que se pretendese xustificar a celebración a distancia, non existe constancia de que se cumprisen os requisitos legais necesarios.
Esta ampliación súmase a unha denuncia previa relacionada con feitos similares ocorridos en decembro de 2025, cando, segundo o PP, a alcaldesa asinaría a súa asistencia a outra xunta de goberno mentres se atopaba fóra do país, nunha viaxe privada, xunto a outros veciños, percibindo ademais as correspondentes dietas.
PRÁCTICA DE DILIXENCIAS
Ante esta situación, o PP de Guitiriz considera que os feitos poderían ter relevancia xudicial, “ao implicar a posible inclusión de datos non veraces en documentos oficiais ou a adopción de acordos en condicións irregulares”. Por iso, solicitaron ao xulgado a práctica de distintas dilixencias, entre elas a remisión do expediente completo da sesión, a comprobación dos documentos electrónicos orixinais e un informe do secretario municipal sobre as circunstancias nas que se celebrou a reunión.
José Manuel López insistiu en que non se trataría dun caso illado, senón dunha posible reiteración de condutas, e defendeu que o seu grupo actúa co obxectivo de garantir a legalidade, a transparencia e a correcta xestión dos recursos públicos en beneficio dos veciños de Guitiriz.
